പകലിരവുകള്‍

പകല്‍,
പുതുമണ്ണില്‍ വെയിലിന്‍ വിത്തെറിഞ്ഞ
സൂര്യന്റെ കളിക്കുഞ്ഞായിരുന്നു.

രാവ്‌,
അനാവരണം ചെയ്യപ്പെടുന്ന പ്രണയികളുടെ
നഗ്നതക്കു മൂടുപടമായ്‌ പകലിന്‍ നിഴല്‍.

നിലാവ്‌,
രാവിനെ പ്രണയിച്ച ചന്ദ്രന്റെ കണ്ണുകളില്‍
നിന്നൊരു തിളക്കം നദിയായൊഴുകിയത്‌.

നിദ്ര,
പൊള്ളിക്കുന്ന പകല്‍ക്കാഴ്ചകളില്‍ നിന്നാ-
ശ്വാസമേകി രാത്രികളില്‍ തഴുകിയെത്തുന്നു.

സ്വപ്നം,
നടക്കാത്ത മോഹങ്ങള്‍ക്കു രൂപമേകി
നിദ്രയില്‍ വിളിക്കാതെത്തുമതിഥി.

നീ,
സൂര്യനെന്‍ പകല്‍ക്കിനാക്കളില്‍ വീണടിയുമ്പോള്‍,
പാതിരാസ്വപ്നത്തിലൊരു ചന്ദ്രനസ്തമിക്കുമ്പോള്‍,
ഒരു കുഞ്ഞു നക്ഷത്രമായി പുനര്‍ജ്ജനിക്കുന്നെന്‍
ഭ്രമാത്മക ദിനചര്യകളിലോര്‍മ്മയായ്‌.

ജോഷി