കാഴ്ച

കാണാത്ത വഴികളില്‍
കാഴ്ച മറയുകയും
വഴികളുടെ വശ്യത
കണ്ണില്‍ നിറയുകയും ചെയ്യുമ്പോള്‍
കാണാക്കാഴ്ചകള്‍ക്ക്‌ കാത്തിരിക്കാതെ
കണ്ണേ... മടങ്ങുക.

നിന്റെ മിഴികളില്‍
നിറങ്ങള്‍ മാത്രം എന്നും നീരാടട്ടെ
നിന്റെ നിറങ്ങള്‍ക്ക്‌
എന്നും ഏഴഴകായിരിക്കുകയും ചെയ്യട്ടെ.

നീ തുടങ്ങുന്നിടത്തു നിന്‍
കാഴ്ച തുടങ്ങട്ടെ.
നിന്നിലൊതുങ്ങാതെ,
നിന്നിലൊടുങ്ങാതെ,
നിന്റെയും എന്റെയും
അവരുടേതുമായി
കാഴ്ചകളെന്നും തുടര്‍ന്നുകൊണ്ടിരിക്കട്ടെ!

സുരേഷ്‌കുമാര്‍ പുഞ്ചയില്‍