എത്രധന്യമീ...

പ്രണയത്തില്‍
ചുംബനം ഏറ്റുവാങ്ങുന്നത്
സ്ത്രീയാകയാല്‍ സുരക്ഷിതയാണ്

ചുംബിക്കുമ്പോള്‍ കണ്ണടയ്ക്കാറുണ്ടോ..
ഒരു മെല്ലെപ്പോക്ക് നല്ലതാണ്
ധൃതിയുടെ ചര്യയില്ലാതെ
ചലനങ്ങളില്‍ അല്പം സന്ദേഹിച്ചു കൊണ്ട്
ചുണ്ടു നീട്ടാനല്പം മുന്നോട്ടായുക.

ചുണ്ടിന്റെ തുമ്പില്‍ ചുണ്ടമര്‍ന്ന
സ്പര്‍ശനസുഖം
എത്ര ധന്യമീ
രണ്ടു ദളങ്ങളുടെ ചേര്‍ച്ച
വാക്കുകള്‍ അണിഞ്ഞൊരുങ്ങാതെ
ഉള്ളിലൊന്നു വിക്കി
നാണമോ മൌനമോ
കുടിച്ചു ദാഹമകറ്റാം അന്നേരം.

വാക്കുകളുടെ അഭാവം ചുംബനത്തിന്റെ പുണ്യമാണ്.

ടൂത്ത് ബ്രഷുകള്‍ സൂക്ഷിക്കുക.
പ്രണയലേഖനങ്ങള്‍ പോലവേ

കുളിമുറിയില്‍
പ്രണയത്തിന്റെ മറ്റൊരു പുരാവസ്തു
നൃത്തം ഉപേക്ഷിച്ച സ്ത്രീ
ചിലങ്കകള്‍ സൂക്ഷിക്കുന്നതു പോലെ...